Dybala dhe Juventusi nuk do të rinovojnë bashkëpunimin mes tyre dhe në fund të sezonit do të vijë lamtumira pas 7 viteve të kaluar së bashku. Në një intervistë të dhënë për “Sky Sport 24”, ish-legjenda e Interit, Beppe Bergomi ka folur për argjentinasin:
“Vazhdoj të mendoj që Dybala është Juventusi. Dhe e kam të vështirë ta shoh në një skuadër tjetër italiane. Është e vërtetë që ka qenë për 7 vite në Torino dhe nuk u bë dot një flamur i ekipit, por për mua Dybala është Juventusi.
Më vjen keq që shoh si përfundoi ky bashkëpunim, siç më erdhi keq kur Donnarumma u largua nga Milani apo Insigne që do të shkojë në Kanada. Një notë për historinë e tij me fanellën bardhezi? 7.5 ose 8 besoj se është e drejtë”, ka thënë Bergomi.
Shumë skuadra kërkojnë të bëjnë të vetin argjentinasin dhe një prej tyre është edhe Interi: “Nuk e shoh shumë funksional te zikaltërit. Roli i tij është si sulmues i dytë, por ka nevojë për një shok reparti me karakteristika të ndryshme nga Dzeko.
Është i fortë teknikisht dhe di të lexojë lojën, por kujt do t’ia jepte topin në thellësi? Interi sulmon shumë nga krahët, por do të mungonte pika e referimit në sulm.
Sigurisht që mund të luajë si sulmues i dytë në skemën 3-5-2, por me organikën që ka sot në dispozicion Interi, Dybala do të haste disa vështirësi”, ka thënë ish-mbrojtësi legjendar i Interit. / Oversport.tv
