UASHINGTON, 30 prill /ATSH-AA/ – Presidenti amerikan Joe Biden, në bisedime me liderët e Egjiptit dhe Katarit, kërkoi nga këto dy vende që të përdorin ndikimin e tyre mbi Hamasin për të arritur një armëpushim në Gaza dhe lirimin e pengjeve.
Një deklaratë me shkrim nga Shtëpia e Bardhë tha se Biden kishte biseda të veçanta telefonike me presidentin e Egjiptit, Abdel-Fattah al-Sisi dhe emirin e Katarit, Sheikh Tamim bin Hamad Al Thani.
Biden trajtoi në mënyrë gjithëpërfshirëse procesin në lidhje me negociatat e armëpushimit aktualisht në tryezë dhe në të cilin marrin pjesë Egjipti dhe Katari, duke falënderuar Sisin dhe Al Thani për përpjekjet e tyre në këtë çështje.
“Nëse Hamasi pranon propozimin e armëpushimit, do të ketë një armëpushim të menjëhershëm në Gaza. Ndihma intensive humanitare do të arrijë në rajon dhe në këmbim Hamasi do të lirojë pengjet,” tha Biden, i cili u kërkoi udhëheqësve të Egjiptit dhe Katarit të përdorin ndikimin e tyre. për Hamasin për çështjen e marrëveshjes së armëpushimit.
Më 26 prill, propozimi i ri i përgatitur me ndërmjetësimin e Egjiptit dhe Katarit për marrëveshjen e armëpushimit dhe shkëmbimin e ndërsjellë të pengjeve iu paraqit Hamasit, ndërsa u nënvizua se Hamasi po punon për këtë propozim dhe së shpejti do të përgjigjet me shkrim.
Në lidhje me procesin e armëpushimit, mediat egjiptiane njoftuan se delegacioni i Hamasit është larguar nga Kajro dhe do t’i përgjigjet me shkrim propozimit egjiptian për një marrëveshje armëpushimi në Rripin e Gazës./ /os/
