Ashtu siç parashikonte propozimi francez, gjuha maqedonase përmendet si e tillë, pa kualifikime dhe fusnota në kornizën negociuese mes Maqedonisë së Veriut dhe BE-së dhe të gjitha dokument zyrtare të Unionit. Megjithatë, në bazë të marrëveshjes, Bullgaria ka përgatitur një deklaratë të njëanshme ku thuhet se përmendja e gjuhës maqedonase në dokumentet e BE-së nuk guxon të interpretohet si njohje e gjuhës maqedonase nga Republika e Bullgarisë. Në deklaratën e tyre, Bullgaria thotë se gjuha maqedonase është kodifikuar në vitet 1944-45 duke u bazuar në gjuhën letrare bullgare me përfshirjen me forma të tjera lokale.
DEKLARATA E BULLGARISË
“Gjuha letrare bullgare ka 6 norma të shkruara rajonale (kodifikime). Tre prej tyre bazohen në dialekte, ndërsa tre në gjuhën letrare bullgare. Krijimi i “gjuhës maqedonase” në vitin 1944-1945 në ish Jugosllavi ishte akt i kodifikimit sekondar (rikodifikim) bazuar në gjuhën letrare bullgare, i “pasuruar” më tej me forma lokale, me çka u simulua proces i “natyrshëm” i bazuar në formë dialektore”.
Sërish në pajtim me propozimin francez, Maqedonia e Veriut i është përgjigjur Sofjes gjithashtu me deklaratë të njëanshme. Në të shpjegohet se gjuha maqedonase, e kodifikuar në vitin 1945, ka vazhdimësi të dëshmuar në këto troje.
DEKLARATA E MAQEDONISË SË VERIUT
“Gjuha letrare maqedonase është kodifikuar në vitin 1945. Bazuar në gjetjet e konfirmuara me akte, teori të pranuara gjerësisht dhe hulumtime empirike të sllavistikës bashkëkohore botërore dhe shkencës gjuhësore, gjuha maqedonase ka vazhdimësinë e saj gjuhësore, hapësinore dhe kohore. Kjo vazhdimësi bazohet në zhvillimin specifik të dialekteve që janë në bazën e saj dhe janë të shpërndara në territorin e Republikës së Maqedonisë së Veriut”.
Deklaratat e njëanshme të Sofjes dhe Shkupit hyjnë në procesverbalin e Bashkimit Evropian, por nuk komentohen zyrtarisht në asnjë dokument të BE-së. Ato nuk ndikojnë as në dokumentet e mëtejshme ku gjuha maqedonase do të vazhdon të njihet si e tillë nga Brukseli. /SHENJA/
