Antonio Konte kërkon që të rikthehet në pankinë, por aventurave në Itali me shumë skuadra, mes të cilave ato fituese me Juventusin dhe Interin, apo edhe në Angli me Çelsin e Totenhemin, tashmë duket se dëshira e tij kryesore është Spanja.
Dhe duke iu referuar të përditshmes katalanase “Sport”, ky burim ka lëshuar bombën ditën e djeshme: trajneri nga Leçe i është ofruar Barcelonës për të pasur Ksavi Hernandezin, pasi ky i fundit ka lajmëruar lamtumirën në fund të këtij sezoni. Klubi kuqeblu sigurisht që e ka mirëpritur këtë dëshirë nga ana e një prej trajnerëve më të vlerësuar në qarkullim, por ndërkohë ka disa çështje që duhen kuptuar dhe studiuar me shumë kujdes.
E para lidhet me aspektin ekonomik, duke qenë se Antonio Konte është një nga trajnerët më të “kripur” për sa i përket aspektit financiar, duke kujtuar se në Angli, në radhët e Totenhemit, ai përfitonte 17 milionë euro neto në sezon, shifër kjo që së bashku me premiot mund të arrinte deri në 22 milionë. Aspekti i dytë është edhe ai i filozofisë, duke qenë se “Gjenerali” nuk ka dyshime se është një nga më punëtorët në qarkullim, kuron në detaje aspektin fizik dhe skuadrat e tij kanë gjithmonë një rezistencë të frikshëm, por në aspektin e spektaklit të lojës çalon.
Dhe pikërisht për këtë fakt, në Katalunjë, edhe pse nuk e kanë injoruar vetofrimin e Antonio Kontes, presidenti Joan Laporta do të punojë dhe shpresojë që të bindë gjermanin Jyrgen Klop, që gjithashtu ka lajmëruar në mes të sezonit, si Ksavi te Barça, lamtumirën e tij nga Liverpuli në fund të sezonit. Dhe vetëm nëse Klop nuk do të pranonte spanjollët, Konte do të ishte një kandidat vërtet serioz si post-Ksavi.
Përgatiti: JETON STAMOLLA – PANORAMASPORT.AL
