Numri i të vdekurve në kryeqytetin e Ukrainës nga sulmet ajrore ruse që synonin disa rajone të vendit është rritur në 28, deklaruan zyrtarët lokalë të hënën.
“Për fat të keq, trupat e të vrarëve si rezultat i sulmeve me raketa janë ende duke u gjetur. Ekipet e shpëtimit nxorën një trup tjetër nga nën rrënoja”, njoftoi Serhiy Popko, kreu i Administratës Ushtarake të qytetit të Kievit, në një deklaratë në Telegram.
Në një deklaratë të mëparshme, Popko tha se numri i të vrarëve ishte rritur në 27 pasi katër trupa të tjerë u gjetën nën rrënoja.
Duke treguar se operacionet e kërkim-shpëtimit në kryeqytet janë ende në vazhdim, Popko tha më tej se 30 persona u plagosën nga sulmet ajrore.
Shërbimi Shtetëror i Emergjencave të Ukrainës (DSNS) tha se gjeti trupat e tetë personave në lagjen Shevchenkivskyi të Kievit gjatë ditës së kaluar.
Të paktën 40 persona u vranë në rajone të ndryshme të Ukrainës pas një sulmi masiv ajror nga forcat ruse të premten, të cilin presidenti Volodymyr Zelenskyy e përshkroi si “sulmin më të rëndë” deri më tani nga Moska.
Pas sulmit, kryebashkiaku i Kievit, Vitali Klitschko tha se një ditë zie do të mbahet në kryeqytet më 1 janar.
Top Channel
