Ministri i Punëve të Jashtme të Hungarisë, Peter Sijarto, vendi i të cilit është kryesues i ardhshëm i Bashkimit Evropian, njofton se gjatë kryesimit një nga çështjet që do të trajtohet do të jetë procesi i zgjerimit.
“Kryesimi duhet të vendosë synime reale për gjashtë muajt e ardhshëm. Kryesimi ka mundësi të vendosë në rend dite disa çështje dhe t’i shpejtojë pak, disa dosje dhe t’i shtyjë përpara. Kryesimi mund ta bëjë këtë. Ne do të përqendrojmë shumë përpjekjet tona në procesin e zgjerimit dhe do t’i shtyjmë ato dosje një nga një. Mendoj se është turp që bisedimet reale të inkuadrimit nuk kanë filluar ende me Maqedoninë e Veriut, por edhe me Shqipërinë. Ne e dimë se Mali i Zi nuk mund të mbyllë asnjë kapitull deri më tani”, thotë Sijarto për emisionin “Agjenda 35” në RTVM.
Ai shton se Hungaria është një nga vendet që mbështet zgjerimin e Unionit dhe se për këtë ka disa arsye.
“BE-ja është në një gjendje të keqe dhe duhet të shtrohet pyetja se si të përmirësohet kjo gjendje”, thotë Sijarto. Ne besojmë se BE-ja ka nevojë për dinamizëm të ri, energji dhe freski të re dhe vendet e Ballkanit Perëndimor mund ta sjellin atë ndikim.
Për vendet anëtare që thonë se fokusi duhet të jetë fillimisht te reformat e brendshme dhe më pas të jenë gati për zgjerim, Sijarto u shpreh se kjo është shumë hipokrite dhe se vendet skeptike apo ata që janë kundër zgjerimit nuk flasin kurrë hapur dhe drejtpërdrejt.
“Ata nuk do të thonë kurrë – ne jemi kundër zgjerimit, nuk jemi dakord që Maqedonia e Veriut të anëtarësohet në BE. Ata gjithmonë do të parashtrojnë disa gjëra artificiale, të cilat ju ndoshta edhe nuk i kuptoni vërtet se çfarë nënkuptojnë. Çfarë do të thotë “reforma e brendshme përpara zgjerimit”? Çfarë do të thotë “thellim para zgjerimit”? Këto janë balona komunikimi, panele komunikimi që nuk kanë asgjë. Ata kanë vetëm funksionin e fshehjes së pozicionit kundër zgjerimit. Prandaj them se ndershmëria duhet të kthehet në debatin e zgjerimit. Sinqeritet dhe respekt të ndërsjellë. Mendojmë se problemi më i madh tani në arenën politike evropiane është mungesa e madhe e respektit të ndërsjellë. Të respektosh Maqedoninë e Veriut, për mua, për shembull, do të thotë që anëtarët e BE-së të flasin drejtpërdrejt dhe hapur për qëndrimet e tyre, në lidhje me zgjerimin dhe pranimin e Maqedonisë së Veriut. Por ata kurrë nuk do ta thonë këtë. Ajo që më frustron gjithashtu është se shoh përfaqësues të shteteve anëtare të flasin publikisht dhe më pas i dëgjoj të flasin pas dyerve të mbyllura”, thekson Sijarto.
Ai thotë se nuk ka dyshim se procesi i zgjerimit është ndalur dhe se si vend kryesues do të bëjnë çmos që të hapen konferenca ndërqeveritare, klasterë dhe kapituj të rinj. – Kjo është ambicia që kemi përpara”, thotë Sijarto.
Lidhur me kërkesën për ekstradimin e ish kryeministrit Nikolla Gruevski, Sijarto thotë se është vendim i gjykatës dhe se Gruevski nuk ka asnjë privilegj.
“Jo, jo, nuk ka privilegje. Ai ka marrë azil dhe procedura është ligjore, jo politike, kështu që kur më pyesni se çfarë do të ndodhë me kërkesën për ekstradim, nuk e kam idenë, sepse nuk është në dorën e Qeverisë, e sidomos jo të Ministrisë së Jashtme për ta vlerësuar atë. Gjithmonë është gjykata që merr vendimin dhe tek ne nuk ndërhyjmë në gjyqësi. Nuk e dimë se çfarë do të ndodhë”, thekson Sijarto.
