UASHINGTON, 2 gusht /ATSH-DPA/ – Lideri i al-Kaedës, Ayman al-Zawahiri është vrarë në një sulm të SHBA-së në Afganistan, konfirmoi presidenti amerikan Joe Biden.
“Të shtunën, në drejtimin tim, Shtetet e Bashkuara të Amerikës përfunduan me sukses një sulm ajror në Kabul, Afganistan, që vrau emirin e al-Kaedës, Ayman al-Zawahiri”, tha Biden.
”Al-Zawahiri, 71 vjeç, ishte thellësisht i përfshirë në planifikimin e sulmeve terroriste të 11 shtatorit 2001 dhe për dekada të tëra ishte organizatori i sulmeve kundër amerikanëve”, tha presidenti amerikan.
”Tani, drejtësia është vendosur”, tha Biden.
Al-Zawahiri, një kirurg egjiptian i kthyer në terrorist, u emërua si kreu i al-Kaedës në vitin 2011, pasi Osama bin Laden u vra nga forcat e operacioneve speciale amerikane në vendstrehimin e tij në Pakistan.
Departamenti Amerikan i Shtetit kishte ofruar një shpërblim deri në 25 milionë dollarë për informacionin që çonte drejtpërdrejt në kapjen e al-Zawahirit./ a.jor.