Aleatët perëndimorë kanë rënë dakord për sanksione të reja financiare kundër Rusisë pas pushtimit të Ukrainës. Bashkimi Evropian, Kanadaja dhe SHBA-ja kanë vendosur të largojnë banka të caktuara ruse nga rrjeti botëror i transaksioneve bankare, SWIFT.
“Kjo do t’i ndalojë të veprojnë në mbarë botën dhe do të bllokojë në mënyrë efektive eksportet dhe importet ruse”, thuhet në deklaratën e përbashkët të aleatëve perëndimorë.
Sanksionet e reja përfshijnë ngrirjen e aseteve të Bankës Qendrore të Rusisë. Sipas Perëndimit, kjo do të ngrijë transaksionet e saj.
“Dhe kjo do ta bëjë të pamundur që Banka Qendrore të likuidojë asetet e saj”, vijon njoftimi i Perëndimit.
Presidentja e Komisionit Evropian, Ursula von der Leyen, shtoi se janë duke punuar që t’u ndalohet oligarkëve rusë të përdorin asetet e tyre financiare në tregjet e Evropës.
“Putini u fut në një rrugë që synon të shkatërrojë Ukrainën. Por ajo që po bën gjithashtu, në fakt po shkatërron të ardhmen e vendit të tij”, deklaroi ajo teksa zbuloi sanksionet e reja për Rusinë.
Ndër të tjera po punohet që oligarkëve rusë t’u hiqet mundësia që ta marrin nënshtetësinë e BE-së.
Rruga Press
