Odeta Gjevori nuk është një emër i panjohur në median shqiptare. Prej vitesh pjesë e emisionit ‘Stop’ në TV Klan, ajo na shoqëron thuajse çdo mbrëmje me prezencën e saj në programin investigativ. Por ndryshe nga ditët e tjera, mesditën e sotme, Odeta ishte e ftuar në emisionin ‘Shije Shtëpie’ me Katerina Trungun, ku për herë të parë foli për ndarjen nga jeta të bashkëshortit.
Ai ishte vetëm 35 vjeç kur ndërroi jetë, ndërsa Odeta 34. Çifti ishin prindër të një vajze të vogël, ndërsa partneri i saj prej 10 vitesh, Juli humbi jetën gjatë pandemisë covid-19. Vogëlushja e tyre, Hana ishte vetëm 2-muajshe kur i ati u nda nga jeta, ndërsa Odeta tregon në emisionin ‘Shije Shtëpie’ në Tv Klan se ajo ishte forca për të vazhduar përpara.
Pjesë nga intervista në studio:
Odeta Gjevori: Unë isha dhe shtatzënë në atë periudhë dhe ruheshim çikë më shumë për arsye të shëndetit. Por ndonjëherë gjërat janë të caktuara nga Zoti dhe ndodhin ashtu siç ndodhën. Për ironi ka persona që nuk janë ruajtur fare ose me një shëndet të lig. Juli nuk vuante nga asnjë sëmundje, thjesht kështu ndodhi.
Katerina Trungu: Ai ishte tridhjetë e…?
Odeta Gjevori: Ai ishte 35 vjeç, kishim diferencë vetëm një vit bashkë me njëri-tjetrin. Kishim 10 vite që njiheshim…
Katerina Trungu: Paska qenë histori e gjatë.
Odeta Gjevori: Po, kemi punuar në 3 televizione bashkë sepse Juli mbulonte pjesën e teknikës domethënë operator tek pulti, montazhier tek lajmet këtu në Klan. Në 3 televizione kemi bashkëpunuar. Ka qenë dhe e bukur sepse qenë po bashkë me njëri-tjetrin, aty ziheshim, aty pajtoheshim.
Katerina Trungu: 10 vite dashuri.
Odeta Gjevori: 10 vite, 7 vite bashkëjetesë. Pastaj nga gjithë kjo dashuri e madhe erdhi Hana, drita jonë. Hana është ai simboli i dashurisë që kisha unë me Julin, është vajza ime që është 2 vjeç e 3 muaj, është si Hanë, siç ka emrin.
Ermelinda Ndoja: Është forca jote më e madhe për të vazhduar…
Odeta Gjevori: Sigurisht, ajo ishte motivi, ishte shumë e vështirë sepse siç e tha dhe Katerina, të jesh një dyshe aq e fortë, fakti që unë jam sot deri këtu është edhe merita e Julit sepse të bësh këtë punë të vështirë Katerinë ti e di shumë mirë se sa sakrificë është. Duhet të kesh një partner i cili të kupton e para e punës dhe pastaj të të suportojë në shumë gjëra të tjera. Ka qenë pak situatë e vështirë por unë kam pasur gjithmonë mbështetjen e Julit dhe në momentin që ndodhi kjo sikur m’u prenë krahët, sikur iku gjysma më e mirë.
Katerina Trungu: Ti ishe në pritje të ëmbël gjatë…
Odeta Gjevori: Në pritje të ëmbël. Sapo linda vajzën, pas dy muajsh ndodhi fatkeqësia. Isha akoma në atë pjesën e përhumbjes, nëse do ta themi kështu, nuk isha akoma e vetëdijshme se çfarë ndodhi. Më është dashur shumë forcë që ta përballoja rikthimin në punë dhe për këtë falenderoj prapë familjen time por edhe kolegët e mi që më sugjeruan që të vija më përpara në punë.
E kisha shumë të vështirë në fillim sepse mori një kthesë ndryshe jeta. Më përpara banoja këtu, tani jam kthyer tek prindërit e mi dhe duhet ta bëj për shkak të vajzës duke qenë se nuk e kam në çerdhe çdo ditë Tiranë-Elbasan. Më duhej të mësoja makinën e shumë gjëra të tjera, por asgjë nuk është e pamundur. Çdo gjë superohet, arrihet nëse e do diçka. Jemi këtu ku jemi sot.
