KIEV, 11 gusht /ATSH-DPA/ – Në një lëvizje vendimtare kundër korrupsionit të përhapur, presidenti ukrainas Volodymyr Zelensky ka shkarkuar të gjithë krerët rajonalë të zyrave të rekrutimit ushtarak në vendin e tij.
“Ky sistem duhet të drejtohet nga njerëz që e dinë saktësisht se çfarë është lufta dhe se cinizmi dhe ryshfeti gjatë luftës është tradhti e lartë”, tha presidenti Zelensky sot në një fjalim.
Ai tha se vendimi është marrë pas një shqyrtimi gjithëpërfshirës të të gjitha zyrave.
Sipas deklaratës, janë shpallur gjithsej 112 raste penale dhe 33 raste të tjera të dyshuara kundër punonjësve të zyrave të rekrutimit ushtarak.
Shkarkimi i kreut të rekrutimit ushtarak të Odesës shkaktoi bujë shkurtin e kaluar pasi ish-zyrtari u akuzua për marrje ryshfeti që nga fillimi i luftës, të cilat ai më pas i përdori për të blerë prona në Spanjë.
Thuhet se ai u kishte ngarkuar njerëzve disa mijëra euro për certifikatat duke thënë se nuk kishin të drejtë të luftonin në luftë.
Ukraina është mbrojtur kundër luftës së agresionit të Rusisë për më shumë se 17 muaj dhe ka nevojë për ushtarë të rinj. Kievi urdhëroi një mobilizim të përgjithshëm në prag të pushtimit.//a.i/
