BERLIN, 11 prill /ATSH-DPA/ – Ministrja e Jashtme gjermane, Annalena Baerbock i telefonoi homologut të saj iranian, Husein Amirabdollahian për të kërkuar uljen e tensionit mes shqetësimeve në rritje për një sulm iranian të drejtuar ndaj Izraelit.
“Askush nuk duhet t’i lejojë vetes të hedhë më shumë benzinë mbi zjarrin. Askush nuk mund të ketë interes për një zjarr me pasoja krejtësisht të paparashikueshme”, tha Baerbock gjatë një takimi me ministrin e Jashtëm kilian, Alberto van Klaveren.
“Të gjithë aktorët në rajon janë thirrur të veprojnë me përgjegjësi dhe të tregojnë vetëpërmbajtje”, theksoi Baerbock, duke shtuar se ky ishte mesazhi që ai i kishte përcjellë Amirabdollahianit.
“Të gjitha linjat telefonike diplomatike janë nën tension në këtë moment për të parandaluar një përshkallëzim rajonal në Lindjen e Mesme”, shtoi ajo.
Baerbock nuk dha detaje të mëtejshme në lidhje me bisedën e saj me ministrin e Jashtëm iranian.
Udhëheqësi suprem iranian Ayatollah Ali Khamenei e ka kërcënuar vazhdimisht Izraelin me hakmarrje pas një sulmi ajror ndaj ambasadës iraniane në Damask në fillim të këtij muaji./ /os/
