DUSELDORF, 19 tetor /ATSH-DPA/-Rreth 300 fluturime të Eurowings u anuluan sot, sipas filialit të “Lufthansa”, në ditën e tretë dhe të fundit të grevës, këtë javë.
“Greva preku rreth dy të tretat e 450 fluturimeve të planifikuara fillimisht në Duseldorf, Këln/Bon, Shtutgart, Hamburg dhe Berlin”, tha një zëdhënës i “Eurowings” në Këln.
“Ne presim të kthehemi nesër në funksionimin normal të fluturimeve”, tha zëdhënësi.
Një zëdhënës i sindikatës së pilotëve “Vereinigung Cockpit”- (VC) tha se ndalesat e punës të planifikuara për këtë javë do të përfundonin në mesnatë.
Nuk është e qartë nëse palët do të kthehen në tryezën e bisedimeve. Një nga pikat kryesore të pengesave ka qenë numri i ditëve pushim, pasi pilotët kërkojnë 14 ditë dhe kompania ajrore së fundmi ka ofruar vetëm 10.//a.i/