TIRANË, 14 shkurt /ATSH/- Qeveria e Britanisë së Madhe tha se do të mbështesë legjislacionin që ndalon pronësinë shtetërore të huaj të gazetave dhe revistave britanike, një lëvizje që mund të prishë blerjet e planifikuara nga konsorciumi i “Telegraph Media Group” i udhëhequr nga Emiratet e Bashkuara Arabe, sipas AP.
Vendimi vjen pasi ligjvënësit nga e gjithë ndarja politike kërkuan ndalimin e pronësisë shtetërore të huaj të gazetave britanike, në vend që të përdornin një qasje rregullatore për të siguruar që botimet të mos përçojnë pikëpamjet e aktorëve shtetërorë.
Ministri përgjegjës për Median, Stephen Parkinson, tha se qeveria do të prezantonte një amendament në “Projektligjin e Tregjeve Dixhitale, Konkurrencës dhe Konsumatorëve” që i është kaluar aktualisht Parlamentit.
Projektligji, i cili pritet të miratohet lehtësisht, do të parandalojë marrjen e botimeve britanike nga qeveritë e huaja. Megjithatë, individët dhe kompanitë e huaja do të vazhdojnë të jenë në gjendje të zotërojnë gazeta dhe revista.
Marrja e propozuar e Grupit Mediatik Telegraph – “The Daily Telegraph”, “The Sunday Telegraph” si dhe revista “The Spectator”, ka qenë gjithashtu subjekt i një hetimi të veçantë, të urdhëruar nga ministrja e Kulturës Lucy Frazer, për shkak të ndikimit të tij të mundshëm në lirinë e shtypit.
Gazetat “The Telegraph” janë aleate të ngushta me Partinë Konservatore në pushtet.//a.i/
