BRUKSEL, 12 prill /ATSH-DPA/- Shërbimet sekrete belge kanë zbuluar një operacion rus që ka për qëllim ndërhyrjen në zgjedhjet e Parlamentit Evropian, njoftoi sot kryeministri Alexander De Croo.
“Objektivi i Moskës është shumë i qartë,” tha De Croo, duke cituar shërbimet sekrete.
“Qëllimi është të ndihmojë në zgjedhjen e më shumë kandidatëve pro-rusë në Parlamentin Evropian dhe të përforcojë narrativën e caktuar pro-ruse në atë institucion”, tha ai.
De Croo tha se kjo ishte krijuar për të dobësuar mbështetjen e Bashkimit Evropian për Ukrainën kundër pushtimit rus në shkallë të plotë.
Kryeministri belg tha se shërbimet sekrete të vendit të tij konfirmuan ekzistencën e rrjeteve të ndikimit pro-rus në Belgjikë dhe në disa vende evropiane.
De Croo tha se ky konfirmim vjen pas raportimit të mediave për një hetim çek ndaj një operacioni pro-rus në BE, për t’iu afruar dhe paguar ligjvënësit e BE-së për të promovuar axhendën e Rusisë.
Kryeministri belg tha se kjo ndërhyrje tani është subjekt i një ndjekjeje penale nga autoritetet belge.//a.i/