Dëmtimi që pësoi në ndeshjen përballë Aston Villës, ishte fatal për Armando Brojën. Sulmuesi shqiptar do të humbasë pjesën e mbetur të sezonit me Chelsean dhe përfaqësuesen e Shqipërisë. 21-vjeçari ka ndarë një mesazh në rrjetet sociale dhe falenderon të gjithë të mbështetësit.
“Jam shumë i mërzitur që e mbylla vitin 2022 në këtë mënyrë. Gjithçka ka qenë e vështirë gjatë ditëve të fundit. Megjithatë jam i vendosur të kthehem më i fortë dhe më i mirë se më parë.” – u shpreh fillimisht Armando Broja në Instagramin e tij personal.
“Secili ka udhëtimin e tij drejt majave, por kjo është vetëm një pengesë e vogël për gjërat e mira që më presin në të ardhmen. Faleminderit të gjithëve që më keni dërguar mesazhe mbështetjeje. I vlerësoj të gjitha, do të kthehem së shpejti.” – përfundoi Armando Broja. /oversport.tv