TEL AVIV, 2 prill /ATSH-DPA/ – Kryeministri Benjamin Netanyahu tha se Izraeli është përgjegjës për sulmin vdekjeprurës ndaj punonjësve të ndihmës në Rripin e Gazës.
Ai e quajti atë një “rast tragjik të një goditjeje të paqëllimshme” nga forcat izraelite ndaj “njerëzve të pafajshëm”, në një video-mesazh të postuar në X.
”Izraeli është në kontakt me qeveritë e njerëzve që u vranë dhe do të bënte gjithçka që një incident i tillë të mos përsëritet”, tha Netanyahu.
Shtatë punonjës të Kuzhinës Qendrore Botërore (WCK) u vranë në sulmin ajror në Rripin e Gazës të hënën, pavarësisht se ishin koordinuar me Forcat e Mbrojtjes të Izraelit (IDF)./ a.jor.
