GJERMANI, 25 korrik /ATSH-DPA/-Autoritetet urdheruan sot evakuimet pas shpërthimit të një zjarri te madh në Gjermaninë lindore.
“Zjarri u përhap shumë shpejt nga një sipërfaqe fillestare prej 10 hektarësh në rreth 100 hektarë”, njoftoi këshilli i qarkut Elbe-Elster.
Zjarri, mes dy qyteteve Leipzig dhe Cottbus, është klasifikuar si një incident i madh dhe rreth 200 banorë të fshatit Rehfeld u evakuuan mbrëmjen e sotme.
Disa qindra banorë të tjerë në komunitetet e tjera aty pranë pritet të përballen me të njëjtin urdhër në orët në vijim.
Temperaturat në Gjermaninë Lindore sot ishin mbi 30 gradë Celsius.
“Tymi ishte i dukshëm në një distancë të gjerë. Të paktën një turbinë me erë është brenda zonës së zjarrit, ndërsa turbina të tjera mbeten në rrezik”, tha zëvendësoficeri lokal i Mbrojtjes, Philipp Haase, duke shtuar se erërat e forta po e bëjnë situatën më të komplikuar.//a.i/