LONDËR, 22 shkurt /ATSH-DPA/ – Është identifikuar objekti astronomik më i ndritshëm që është parë ndonjëherë në univers, i cili shkëlqen sa 500 trilionë diej.
Objekti është një bërthamë galaktike, më e ndritura dhe më e shpejta në rritje midis atyre që janë vëzhguar deri më tani.
I quajtur ”J0529-4351”, ai fuqizohet nga një vrimë e zezë me një masë 17 miliardë herë më të madhe se Dielli që po rritet me shpejtësinë e një mase diellore në ditë.
Këtë e demonstrojnë të dhënat e mbledhura falë Teleskopit Shumë të Madh të Observatorit Evropian Jugor në Kili, botuar në revistën ”Nature Astronomy”.
“Ne kemi zbuluar vrimën e zezë me rritje më të shpejtë të njohur deri më tani”, thekson Christian Wolf, astronom në Universitetin Kombëtar Australian (ANU) dhe autori i parë i studimit.
Lënda e tërhequr drejt kësaj vrime të zezë, në formën e një disku, lëshon aq shumë energji sa 500 trilion herë më i shndritshëm se Dielli.
“E gjithë kjo dritë vjen nga një disk i nxehtë grumbullimi që mat shtatë vite dritë në diametër”, theksoi Samuel Lai, bashkautor i punimit.
”Është befasi që ka mbetur i panjohur deri më sot, kur tashmë dimë rreth një milion kuazarë më pak të shquar”, komenton bashkautori Christopher Onken./ /os/