BERLIN, 2 korrik /ATSH-DPA/- Maskat e shkallës së lartë FFP2 për të shmangur koronavirusin nuk kërkohen më në transportin publik në shtetin jugor gjerman të Bavarisë, një vendim që shkaktoi kritika nga ministri i Shëndetësisë në vend.
Politika e re, e cila hyri në fuqi të shtunën, i lejon pasagjerët të përdorin autobusët dhe trenat e udhëtarëve nëse mbajnë vetëm maska mjekësore. Maskat mjekësore nuk sigurojnë të njëjtin nivel mbrojtjeje kundër grimcave të ajrit si maskat FFP2, të cilat janë ekuivalente me maskat N95 ose KN95 të përdorura në disa vende të tjera.
“Ne do të mbështetemi në përgjegjësinë individuale të qytetarëve,” tha ministri bavarez i Shëndetësisë Klaus Holetschek ndërsa relaksimi i masave hyri në fuqi.
“Duke pasur parasysh muajt e nxehtë të verës, siç po përjetojmë tani, dhe duke pasur parasysh kushtet aktuale të pandemisë, ne mendojmë të rrisim përgjegjësinë”, shtoi ai.
Ministri Federal i Shëndetësisë Karl Lauterbach e quajti vendimin një dështim, duke marrë parasysh shifrat e fundit te rasteve me Covid-19. //a.i/
