Gjatë ndeshjes së Zvicrës kundër Republikës Çeke, një koment racist i lexuesve u publikua në portali “Blick.ch”. Ishte një gabim nga ana e redaksisë
Të enjten në mbrëmje, Kombëtarja zvicerane humbi ndeshjen hapëse të Ligës së Kombeve kundër Republikës Çeke 1:2. Zvicra është zhgënjyer. Ajo që në asnjë mënyrë nuk justifikohet, është një koment i një leuesi në portalin “Blick.ch”. Në rubrikën e komenteve ai ofendoi në mënyrë raciste kapitenin e kombëtares Granit Xhaka dhe lojtarë të tjerë. Një koment që nuk duhet të ishte aktivizuar kurrë nga redaksia, por ja që ka ndodhur dhe redaksia e pranon fajin.
Granit Xhaka e sheh komentin pak pas përfundimit të lojës dhe poston një screenshot të tij në storjen e tij në Instagram. Ai shkruan: “Kjo nuk do të ndryshojë kurrë”. Që atëherë, komenti është fshirë.
Blick është i shqetësuar për ta bërë të qartë se racizmi nuk ka vend në shoqërinë tonë. “Më fal Granit i dashur”, thotë Steffi Buchli, kryeredaktore e Sportit. “Ishte një defekt që nuk duhej të ndodhte. Zvicra është multikulturore, ne jemi një shoqëri shumëngjyrëshe. Një Granit, një Xhibril ose një Xherdan janë po aq zviceranë sa një zviceran mund të jetë një Roger, një Andy ose një Claudio. Është pjesë e pretendimit dhe përgjegjësisë së “Blick” që të publikohen vetëm komentet që përputhen me udhëzimet tona.
Të premten në mëngjes, drejtori i Kombëtares zvicerane, Pierluigi Tami, komentoi në Tëitter: “Kapiteni ynë Granit Xhaka iu përgjigj komentit të një lexuesi mbrëmë. Komentet e tilla të lexuesve janë të poshtër dhe lëndues, na bëjnë të trishtuar dhe të lënduar. Çdo lojtar i vetëm kombëtar është jashtëzakonisht krenar që luan për vendin e tij dhe stërvitet fort për të. Respekti dhe toleranca janë vlera themelore të jetuara në SFV, të cilat ne i kërkojmë gjithashtu nga të gjithë shikuesit dhe fansat”.
Pak më vonë kapiteni i Kombëtares zvicerane mori mbështetje edhe nga organizata “Fankurve Schweiz”. Në një mesazh të publikuar nga shoqata e futbollit në Twitter, ajo shkruan: “Duhet ta dini se është një pjesë e vogël e idiotëve që flasin kështu për ju lojtarët zviceranë. Ata janë racistë që ne nuk i tolerojmë në bazën tonë të tifozëve. Këta nuk janë tifozë, ata janë njerëz të zemëruar që janë të pakënaqur me veten. Njerëz të tillë nuk e kanë kuptuar kulturën zvicerane dhe politikën tonë të migracionit që lidhet me të, si dhe futbollin, që do të thotë tolerancë dhe multikulturë. Mos u mashtroni nga idiotë të tillë”.
