KIEV, 21 nëntor /ATSH-DPA/ – Presidenti i Këshillit Evropian, Charles Michel mbërriti sot në Kiev, pas vizitave të shefave të Mbrojtjes të Shteteve të Bashkuara të Amerikës dhe Gjermanisë.
Takimi i Michel me presidentin ukrainas Volodymyr Zelensky do të fokusohet në perspektivat e anëtarësimit të vendit në BE.
Vizita e Michel në Kiev rikonfirmon mbështetjen e BE-së për Ukrainën.
Pavarësisht luftës së vazhdueshme me Rusinë, qeveria në Kiev po punon shumë për të zbatuar reformat që nevojiten për t’u bashkuar me unionin 27-anëtarësh.
Ukraina shënon sot 10 vjet nga fillimi i protestave të Euromaidan që përfshiu vendin.
Ato u shkaktuan nga vendimi i presidentit pro rus Viktor Janukoviç për të mos nënshkruar një marrëveshje asociimi me BE-në.
Michel tha se protestuesit ukrainas kishin vdekur në duart e forcave të sigurisë së Janukoviç pasi ata besonin te “vlerat evropiane” dhe donin një të ardhme të lirë.
“Dhe kjo është arsyeja pse ky moment është i rëndësishëm dhe unë gjithashtu do të përpiqem ta përdor këtë moment për të shprehur bindjen se BE-ja do të jetë më e sigurt dhe më e fortë me anëtarësimin e Ukrainës”, tha ai.//a.i/