KIEV, 1 maj /ATSH-DPA/- Dronët ukrainas kanë dëmtuar një rafineri në Ryazan, rreth 200 kilometra në juglindje të Moskës, tha një përfaqësues i shërbimit të inteligjencës ushtarake ukrainase HUR.
“Një objektiv ushtarak u godit në Ryazan. Ka dëme të konsiderueshme”, sipas raportimeve.
Mediat e pavarura ruse raportuan për një zjarr në rafinerinë Ryazan.
Objektivi i dytë ishte një fabrikë e përpunimit të naftës në rajonin rus, Voronezh.
Shërbimi i inteligjencës nuk e konfirmoi zyrtarisht informacionin, por shtypi ukrainas është informuar për sulme të tilla në fshehtësi.
Ministria ruse e Mbrojtjes në Moskë njoftoi se dronët luftarakë ukrainas u kapën gjatë natës mbi rajonet ruse, Voronezh, Ryazan, Belgorod dhe Kursk.
Forcat e armatosura të Ukrainës kanë zhvilluar më tej dronët e tyre dhe kanë sulmuar rafineritë në brendësi të Rusisë për disa javë.
Qëllimi është ndërprerja e furnizimit me karburant për ushtrinë ruse.
Shtetet e Bashkuara të Amerikës i kanë kritikuar këto sulme për shkak se i druhen një ndikimi në çmimet botërore të naftës.
Megjithatë, Kievi vazhdon t’i qëndrojë kësaj taktike. Ukraina ka më shumë se dy vjet që po i shmanget një pushtimi rus në shkallë të gjerë.
Qyteti lindor i Ukrainës, Kharkiv, u godit sot nga disa bomba rrëshqitëse të lëshuara nga avionët rusë nga një distancë e sigurt.
Guvernatori Oleh Syniehubov raportoi të paktën tre vdekje.
Gjatë natës, Rusia gjuajti me raketa qytetin port ukrainas, Odesën në Detin e Zi.
Sipas guvernatorit rajonal Oleh Kiper, tre persona u vranë dhe tre të tjerë u plagosën.//a.i/
