Kreu i Qeverisë së Kosovës, Albin Kurti, ka paralajmëruar hetim të ri për numrin e veteranëve të luftës, duke insistuar se numri i veteranëve se kalon 20 mijëshen, raporton Ekonomia Online.
E qëndrime të
ndryshme ka pasur nga pozita dhe opozita. Deputeti i partisë që e udhëheq
Kurti, Enver Dugolli në një intervistë për Ekonomia Online ka sqaruar se
kryeministri Kurti ka biseduar me shoqatat e dala nga lufta lidhur me fryrjen e
numrave të listave.
Tutje, Dugolli
tha se nuk e fajësojnë askënd derisa të vërtetohet se sa është numri real, por
që thotë se edhe vet veteranët e dinë që shifrat nuk janë reale.
“Kryeministri
Kurti ka kontaktuar shoqatat e dala nga lufta dhe është biseduar për këtë
çështje. Këtë çështje e kanë ngritur vetë veteranët sepse në mungesë të
informacioneve të duhura ata kanë dashur që të shkëmbejnë informata edhe me Qeverinë
në lidhje me numrin e veteranëve. Kjo çështje nuk është e tanishme”.
“Këtë fryrje të
numrave apo rritje të numrave të veteranëve e kanë ngritur edhe qeveritë e
kaluara mirëpo nuk kanë arritur të marrin diçka konkrete në këtë drejtim. Edhe
tani nuk ka ndonjë vendim që është marrë që të fillohet me pastrimin e këtyre
listave, por vetëm është biseduar. Vetë veteranët e dinë që nuk është numër
real. Ne nuk fajësojmë askënd derisa të shihet se kush e meriton e kush jo në
ato lista. Vetë veteranët do t’i prijnë kësaj çështje”, tha Dugolli.
Ndërsa, deputeti
i AAK-së, Pal Lekaj ka komentuar deklaratën e kryetarit të partisë së tij
Ramush Haradinaj, duke thënë se duhet të mbrohen vlerat e luftës dhe të
mosluhet me veteranët, raporton EO.
“Haradinaj ka
pasur të drejtë kur ka thënë që duhet të mbrohen vlerat e luftës dhe duhet të
mbrohen ata që kanë luftuar për vendin”.
“Ne sot e gëzojmë lirinë dhe asesi të mos bëhet shaka me ta. Haradinaj iu lut zotit Kurti që të mos luaj më me veteranë me ata të cilët na kanë sjellë lirinë”, tha Lekaj.
