BERLIN, 10 mars /ATSH-DPA/- Ambasadori i Ukrainës në Gjermani, Andriy Melnyk tha se nevojitet një shkëmbim i drejtpërdrejtë midis presidentit rus Vladimir Putin dhe presidentit ukrainas Volodymyr Zelensky, pasi ministrat e Jashtëm rus dhe ukrainas nuk arritën një progres në bisedimet e fundit.
“Ne besojmë se vetëm në nivelin më të lartë midis dy presidentëve është e mundur të gjendet një zgjidhje”, tha Melnyk për ARD.
Lidhur me takimin e ministrave të Jashtëm në Turqi Melnyk tha se ishte shumë zhgënjyes.
Gjithashtu, ai hodhi poshtë sugjerimet se Kievi ka braktisur synimin e tij për t’u bashkuar me NATO-n.
“Qëllimi mbetet para nesh, por sigurisht që ne jemi të gatshëm të flasim edhe për çështje të tjera në bisedimet e nivelit të lartë me Rusinë”, tha ai.
Melnyk tha se perspektiva e anëtarësimit në BE ishte gjithashtu një çështje kyçe për Ukrainën. //a.i/
