Presidenti i Serbisë, Aleksandar Vuçiq, i dorëzoi sot kryeministrit hungarez Viktor Orban “Urdhrin e Republikës së Serbisë” në një varëse të madhe për shërbime të jashtëzakonshme në zhvillimin dhe forcimin e bashkëpunimit paqësor dhe marrëdhënieve miqësore mes dy vendeve.
Presidenti i Serbisë, Aleksandar Vuçiq, tha sot pas takimit me kryeministrin e Hungarisë, Viktor Orbán, se të dyja vendet kanë arritur nivelin më të lartë të marrëdhënieve në historinë moderne dhe se është mirënjohës për mbështetjen për integrimin evropian të Serbisë.
Vuçiq vlerësoi se Orban është një mik i madh dhe i sinqertë i Serbisë dhe i popullit serb, si dhe që marrëdhëniet mes dy vendeve kanë arritur shkallën më të lartë. Ai shprehu mirënjohjen për mbështetjen e qartë të Hungarisë për Serbinë, në rrugën evropiane dhe në të gjitha çështjet e rëndësishme rajonale dhe tha se Hungaria ka një mik të madh në Serbi.
Kreu i shtetit serb shprehu gjithashtu mirënjohje për kontributin personal të Orbanit në marrëdhëniet e mira mes dy kombeve.
“Faleminderit që e ndihmuat Serbinë të mbijetojë më lehtë këtë dimër të gjatë dhe të ftohtë edhe në këto muaj kur të gjithë i shikuan vetëm interesat e tyre”, tha Vuçiq.
Ai i uroi mirëseardhjen Orbanit edhe në llogarinë e tij në Instagram, duke shkruar: “Mirë se erdhe, mik i dashur. I gëzohem takimit dhe bisedës tonë, e cila bazohet në mirëkuptimin dhe besimin e ndërsjellë, por edhe në miqësinë që kemi ndërtuar gjatë bashkëpunimit shumëvjeçar”.
Orban: Ne po mbrojmë derën jugore të Evropës
“Nuk e marr mirënjohjen si dekorim për atë që kam bërë deri më tani, por për atë që do të bëj nga sot në interes të miqësisë serbo-hungareze”, tha Viktor Orbán, duke folur për gazetarët pas takimit me Vuçiqin.
“Hungarezët dhe Serbia kanë një punë të përbashkët, e ajo është të mbrojnë derën jugore të Evropës, ky është misioni i dy vendeve tona”, tha sot Orbán pas takimit me presidentin serb Vuçiq.
Lidhur me politikën e sanksioneve të Bashkimit Evropian ndaj Rusisë për shkak të luftës në Ukrainë, ai shtoi se askush prej tyre nuk është në një situatë të lehtë.
Natyra e sanksioneve është e tillë që vendosen në vende larg vendit kundër të cilit janë futur, tha kryeministri hungarez, duke shtuar se Hungaria është “më afër vendit të sanksionuar, Rusisë”.
“Evropianët janë xhuxhë energjetikë që po vendosin sanksione kundër një gjiganti energjetik”. Një gjë e tillë është e pazakontë në histori dhe nuk mund të çojë në të mirë”, tha Orbán dhe shprehu dëshirën e tij për të “vendosur politikën e sanksioneve në Bruksel mbi një bazë më të arsyeshme”.
Kur u pyet për dënimin e Parlamentit Evropian të “përpjekjeve të qëllimshme dhe sistematike të qeverisë hungareze” për të minuar vlerat evropiane, Orban shtoi se vendimi i PE ishte “në fushën e shakave”. “Ne nuk qeshim sepse është një shaka shumë e mërzitshme”, u shpreh Orbán.
Në PE ka një shumicë të majtë, ndaj, siç tha Orban, “nuk bëhet fjalë për formimin e një opinioni objektiv”, dhe dokumenti i miratuar mund të quhet “pamflet”.
Duke folur për valët e migrantëve, ai tha se Serbia dhe Hungaria duhet t’i kanalizojnë ato në një “kanal të caktuar historik”.
Historia, gjeografia dhe miqësia shekullore i lidh dy popujt dhe ju falënderoj që më konsideroni të denjë për çmimin e Serbisë, deklaroi Orban.
Kur unë dhe Qeveria punojmë në interes të miqësisë serbo-hungareze, ne punojmë për të përmbushur njohuritë r vjetra. Hungaria dhe Serbia duhet të jenë miq, sipas Orban.
Ai bëri shaka se miqësia prishet vetëm në një gjë – në vaterpolo, sepse u duhet të luftojnë me njëri-tjetrin në pishinë.
