VARSHAVË, 16 prill /ATSH-DPA/- Polonia synon të përmirësojë mbrojtjen e saj ajrore derisa të jetë po aq e sigurt sa Izraeli, tha sot kryeministri Donald Tusk në Varshavë, pas një takimi të kabinetit për sigurinë kombëtare.
Tusk vuri në dukje se Izraeli kishte interceptuar pothuajse të gjitha raketat dhe dronët e gjuajtur ndaj tij nga Irani gjatë fundjavës, ndërsa Ukraina, fqinji i Polonisë në jug, është në gjendje të përgjojë vetëm një të tretën e raketave ruse.
“Detyra jonë sot konsiston në përdorimin e çdo sistemi për mbrojtjen e hapësirës ajrore polake për ta bërë Poloninë po aq të sigurt sa Izraeli”, tha ai.
“Përfundimi që duhej nxjerrë ishte se hapësira ajrore duhej të kontrollohej për të përmirësuar sigurinë e Polonisë”, tha ai.
Tusk shtoi se Polonia ishte e interesuar t’i bashkohej nismës gjermane “European Sky Shield”, e cila do të përfshinte disa vende evropiane që do të blinin raketat “Iris-T” të Gjermanisë me qëllim të sigurimit të hapësirës ajrore evropiane.
Polonia ka qenë një aleat i vendosur ushtarak i Ukrainës në përpjekjen e saj për të luftuar pushtimin rus gjatë dy viteve të fundit.
Është gjithashtu një qendër e rëndësishme për dërgesat e armëve perëndimore në Ukrainë. Polonia shihet nga Rusia si një armik i mundshëm.
Gjermania i ka ofruar Ukrainës sistemin e raketave “Iris-T” dhe ka premtuar dërgesa të mëtejshme. //a.i/
