Ish-presidenti i SHBA Donald Trump ka nisur një aksion për mbledhjen e të dhënave në një gjykatë në Londër kundër firmës Orbis të ish-agjentit Christopher Steele, duke thënë se ai pësoi “dëm të konsiderueshëm dhe ankth mendor” për publikimin e dosjes tanimë famëkeqe Steel, e cila përmbante ndër të tjera, akuzat për lidhje të supozuara mes Kremlinit dhe suksesit të tij në zgjedhjet presidenciale të vitit 2016.
Sipas Bloomberg, Trump, i cili po kërkon nga gjykata që të shpallë të rreme akuzat në dosje, tha se është gati të dëshmojë në gjyqin në Londër.
Dosja bëri bujë në mbarë botën kur u zbulua në janar 2017 me pretendimet se shërbimet ruse të sigurisë kishin komprometuar fushatën presidenciale.
Në parashtresat me shkrim nga ekipi ligjor i Trump, thuhej se dosja përmban pretendime të rreme se Trump “kishte një marrëdhënie komprometuese me Kremlinin” dhe se ai ishte përfshirë në “sjellje seksuale të shthurura”, duke përfshirë punësimin e prostitutave në suitën presidenciale të një hoteli në Moskë, raportoi BBC.
Hugh Tomlinson, i cili punon për ish-presidentin amerikan, tha se dosja gjithashtu pretendon në mënyrë të rreme se ai “u ka paguar ryshfet zyrtarëve rusë për të çuar përpara interesat e tij të biznesit” dhe “ka marrë pjesë në festa seksi në Shën Petersburg”.
Ndërhyrja e mundshme ruse në zgjedhje
Avokatët e ish-presidentit i thanë gjykatës se donin të kundërshtonin “akuzat e rreme nga viti 2017” dhe argumentuan se “dokumenti shkel ligjet e Mbretërisë së Bashkuar për mbrojtjen e të dhënave”.
Kompania e Christopher Steele “Orbis Business Intelligence” deklaron se nuk e ka publikuar dokumentin e përmendur.
Në vitin 2016, kompanisë iu kërkua nga një konsulencë politike amerikane që të përgatiste një raport mbi ndërhyrjen e mundshme ruse në zgjedhjet e përgjithshme të SHBA-së atë vit.
Vihet re se projekti dyshohet se është paguar nga demokratja Hilary Clinton dhe kundërshtarë të tjerë politikë të Trump.
BBC kujton se Christopher Steele, ish-kreu i departamentit të MI6 për Rusinë, më vonë ia dërgoi gjetjet e tij agjencisë FBI, oficerit britanik të sigurisë kombëtare dhe një ndihmësi të një senatori të lartë amerikan. /tesheshi.com/
