BERLIN, 15 korrik /ATSH-DPA/ – Autoriteti i aviacionit i Arabisë Saudite njoftoi planet për të hapur hapësirën ajrore për të gjitha linjat ajrore që plotësojnë kërkesat e autoritetit për fluturim, në një gjest që shihet si një sinjal i afrimit me Izraelin.
Presidenti amerikan, Joe Biden, i cili aktualisht është në një vizitë shtetërore në Izrael dhe do të udhëtojë sot në Arabinë Saudite, vlerësoi lëvizjen e udhëheqjes saudite si një “vendim historik”.
Izraeli dhe Arabia Saudite nuk kanë marrëdhënie diplomatike, me mbretërinë e Gjirit që as nuk e njeh Izraelin si shtet, një arsye e mundshme pse deklarata saudite nuk i referohej Izraelit me emër.
Sidoqoftë, Arabia Saudite ka lejuar përdorimin e hapësirës së saj ajrore për fluturime midis Izraelit dhe Emirateve të Bashkuara Arabe dhe Bahreinit që kur dy fqinjët e saj të Gjirit vendosën marrëdhënie diplomatike me Izraelin, në vitin 2020 nën ndërmjetësimin e SHBA-së.
Para kësaj, aeroplanët izraelitë ishin të ndaluar të fluturonin mbi vend./ a.jor.
