Qindra qytete dhe fshatra në Bolivi janë vënë në alarm, pasi shirat e rrëmbyeshëm vazhdojnë të bëjnë kërdinë në vendin e Amerikës së Jugut.
Zyrtarët thonë se 33 njerëz kanë vdekur që nga nëntori për shkak të reshjeve, të cilat kanë shkaktuar rrëshqitje dheu dhe kanë bërë që lumenjtë të dalin nga shtrati.
Numri i viktimave është tetë herë më i lartë se në të njëjtën periudhë të vitit të kaluar.
Zyrtarët po monitorojnë me kujdes një numër digash për të cilat kanë frikë se mund të vërshojnë.
Zëvendësministri për Mbrojtjen Civile, Juan Carlos Calvimontes, tha se nga 340 komunat e Bolivisë, 10 ishin vënë në alarmin më të lartë dhe 279 të tjera ishin në alarm portokalli – e dyta më e larta.
Zyrtarët thanë gjithashtu se ndihma humanitare ishte dërguar në Achocalla, në provincën La Paz, ku një grua 35-vjeçare dhe dy fëmijët e saj u varrosën në një rrëshqitje balte që përfshiu shtëpinë e tyre.
Një fqinj i tha gazetës lokale Correo del Sur se ajo i kishte bërtitur gruas që të dilte nga shtëpia, por që nëna ndoshta nuk kishte arritur t’i rrëmbejë fëmijët e saj në kohë.
Më shumë se 20 persona u plagosën gjithashtu.
Gjithashtu në provincën La Paz, autoritetet po vëzhgojnë nga afër nivelet e ujit në digën Incachaca.
Ekspertët e qeverisë së bashku me kryetarin e qytetit të La Paz, i cili ndodhet në rrjedhën e poshtme të digës, e inspektuan atë të dielën.
Kryebashkiaku Iván Arias tha se ndërsa niveli i ujit në rezervuar kishte “arritur 100%”, uji aktualisht po kullonte mirë dhe ai nuk parashikonte “ndonjë pasojë të madhe në drejtim të rrymës”.
Tre rezervuarë të tjerë – Hampaturi Alto, Pampalarama dhe Alpaquita – janë gjithashtu në nivelin e tyre maksimal.
Shirat e dendur kanë goditur Bolivinë pas një thatësire të zgjatur dhe një prej dimrave më të nxehtë që ka përjetuar vendi.
Në tetor, qindra njerëz ishin mbledhur në rezervuarin Incachaca – i cili tani është afër tejmbushjes – për t’u lutur për shi.
Ngjarjet ekstreme të motit nuk janë të rralla në Bolivi, por një atmosferë ngrohëse e shkaktuar nga ndryshimet klimatike ka bërë që reshjet ekstreme të shiut të jenë më të mundshme.
Bota tashmë është ngrohur me rreth 1.1C që nga fillimi i epokës industriale dhe temperaturat do të vazhdojnë të rriten nëse qeveritë në mbarë botën nuk bëjnë shkurtime të mëdha të emetimeve.
Top Channel
