RIGA, 28 shkurt /ATSH-ANSA/ – Letonia nuk e kundërshton vendosjen e trupave perëndimore në Ukrainë, duke iu bashkuar mendimit të presidenti francez Emmanuel Macron se dërgimi i trupave perëndimore atje nuk ishte “përjashtuar”, ndërsa Spanja, Gjermania dhe vende të tjera në BE, e kundërshtuan atë.
“Letonia vazhdon të shqyrtojë shumë mënyra të ndryshme për të forcuar mbështetjen për Ukrainën. Nëse aleatët e NATO-s arrijnë një marrëveshje për vendosjen e trupave në Ukrainë, Letonia do të konsideronte pjesëmarrjen”, deklaroi zëdhënësi i ministrisë së Mbrojtjes.
Letonia ka ofruar mbështetje ushtarake që nga fillimi i luftës duke përfshirë armë dhe trajnime ushtarësh.
Megjithatë, ministri i Jashtëm spanjoll José Manuel Albares përjashtoi kategorikisht dërgimin e ushtarëve spanjollë në zonën e luftës.
“Nuk do të ketë trupa spanjolle në Ukrainë, natyrisht jo, sepse ne duam paqen, që është pikërisht ajo që dëshiron qeveria ukrainase”, theksoi Albares. /os/
