Tërmet shtatë ballësh mund të konsiderohet fitorja që PSG ka arritur në transfertë përballë Lille në kuadër të javës së tretë të Ligue 1. Gjigantët kryeqytetas kanë fituar me rezultatin e thellë 7-1 në një ndeshje në limitet e perfektes.
Takimi nis menjëherë me një gol që në sekondat e para, pasi ylli Kylian Mbappe çon topin në rrjetë. Pak minuta më vonë është koha që një tjetër yll të ndizet dhe këtë herë dyfishimi i rezultatit vjen nga këmbët e Lionel Messit.
Goli i tretë shënohet nga Achraf Hakimi, ndërsa pokeri plotësohet nga braziliani Neymar. Ky i fundit hap edhe siparin e golave të pjesës së dytë duke çuar rezultatin në 5-0.
Lille sakaq shënon golin e nderit në minutën e 54-t me anë të Bamba, ndërsa rezultati final i takimit u vulos nga dy gola të tjerë të Kylian Mbappe. Ylli francez plotësoi edhe tripletën e tij personale në këtë takim. Kështu pasi janë luajtur tre javë PSG ka grumbulluar 9 pikë si dhe në vetëm tre takime ka realizuar 17 gola. /oversport.tv
Foto: Paris Saint-Germain, Twitter
