Më shumë se 4000 demonstrues ishin mbledhur sot në periferi të Perpignan, në jug të Francës për të kundërshtuar planet për ndërtimin e një impjanti golfi në një zonë fushore që supozohet të jetë e goditur nga thatësira.
Punimet kanë nisur tashmë për krijimin e kompleksit të golfit Villeneuve-de-la-Raho, në rajonin që vitet e fundit është përballur me thatësirë të pazakontë.
“Nëse ka mungesë uji, atëherë le ta përdorim atë që është për shumicën e njerëzve dhe për të mirën e përbashkët”, tha një protestues për rrjetin AFP.
“Ky është një projekt i çmendur,” shprehet aktivistja Astrid Osland, e cila ashtu si të tjerët kanë protestuar që prej nisjes së punimeve, në perimetrin që ndan ambjentet nga publiku me anë të një gardhi plastik.
Projekti parashikon ndëritmin e një fushe golfi ‘me 18-vrima’ dhe të 600 shtëpive banimi në rreth 30 hektarë.
“Me mobilizimin e gjerë që kishim sot shpresojmë që ministri i tranzicionit ekologjik të zgjohet e t’i japë fund projektit”, tha organizatori Me Mathieu Pons-Serradeil, që përfaqëson dy grupe protestuese, “Pays catalan ecologie” e “Agissons 66”.
“Ne këtu nuk kemi 60% të sasisë së reshjeve,” tha për AFP Nicolas Garcia, kryetar i zgjedhur për ujin në rajon. “Nevojiten 600 mm shi për të rikuperuar tharjen e tokës dhe të paktën 350 mm për të kaluar verën.”
Por reshjet kanë qenë të pakta tre vitet e fundit derisa qeveria lokale vendosi masa të kufizimit të ujit në 2022.
Kjo sipas protestuesve bie në kundërshtim me idenë e një kompleksi golfi që ka nevojë për ujitje të vazhdueshme.
Një forum studiuesish në shkurt dënoi projektin si një “emblemë e vizionit të prapambetur” dhe si një privilegj për të pasurit.
“Kur je i pasur nuk pëson kufizime, ndërsa një qytetar i zakonshëm duhet të kufizojë përdorimin e ujit, ky është një mesazh skandaloz”, tha aktivisti Jean Codognes./AFP/
Top Channel
