NJU JORK, 22 dhjetor /ATSH-DPA/ – Pas disa ditësh diskutimesh, Këshilli i Sigurimit i Kombeve të Bashkuara miratoi një rezolutë duke bërë thirrje për më shumë ndihmë humanitare për civilët në Rripin e Gazës, duke rënë dakord për një tekst shumë të zbutur që lejonte Shtetet e Bashkuara, mbështetësi më i madh i Izraelit, të abstenonin.
Organi më i fuqishëm i Kombeve të Bashkuara shtyu votimin për një rezolutë të re për luftën në Gaza disa herë këtë javë pasi u duk e mundshme që Shtetet e Bashkuara, një anëtare e përhershme e Këshillit, do të vendosin veton ndaj një drafti të propozuar nga Emiratet e Bashkuara Arabe.
Koncesionet masive nga negociatorët penguan që rezoluta të dështonte në sekondën e fundit.
Në total, 13 nga 15 vendet e përfaqësuara në Këshill votuan në favor të tekstit, me Rusinë që abstenoi së bashku me Shtetet e Bashkuara.
Rezoluta, e detyrueshme sipas ligjit ndërkombëtar, i bën thirrje Izraelit të garantojë “qasje të menjëhershme humanitare” në Rripin e Gazës dhe të krijojë “kushtet për një ndërprerje të qëndrueshme të armiqësive”. /os/
