NJU JORK, 5 shkurt /ATSH-DPA/ – Ish-ministrja e Jashtme franceze, Catherine Colonna do të drejtojë hetimet për akuzat e ngritura nga Izraeli kundër Agjencisë së Kombeve të Bashkuara për Ndihmën dhe Punët për Refugjatët Palestinë në Lindjen e Afërt (UNRWA).
“Colonna do të punojë së bashku me ekspertët e Institutit Raoul Wallenberg në Suedi, Institutit Michelsen në Norvegji dhe Institutit Danez për të Drejtat e Njeriut për të hetuar akuzat kundër agjencisë UNRWA”, njoftuan sot Kombet e Bashkuara.
Izraeli ka akuzuar disa punonjës të UNRWA-s për përfshirje në sulmet terroriste të 7 tetorit të udhëhequr nga grupi militant palestinez Hamas.
Disa donatorë të mëdhenj perëndimorë të UNRWA-s, duke përfshirë SHBA-në dhe Gjermaninë, pezulluan përkohësisht pagesat për agjencinë e ndihmës në Gaza pas akuzave.
Grupi do të fillojë punën e tij më 14 shkurt dhe një raport i përkohshëm pritet të dalë para fundit të marsit.
Paneli i ekspertëve pritet të shqyrtojë nëse UNRWA ka shkelur masat që synojnë ruajtjen e neutralitetit të grupit në Rripin e Gazës, i cili drejtohej nga Hamasi që nga viti 2007.//a.i/
