Do të jetë një tjetër ditë me evente sot në Oversport dhe Tibo ku nuk do të mungojnë emocionet nga fusha e blertë, por jo vetëm. Dita starton me peshëngritësit që zbresin në pedanë në Kampionatin Europian të Peshëngritjes U23. Prej orës 10:00 e në vazhdim përgjatë ditës do të keni mundësi të ndiqni atletët që garojnë në disa disiplina.
Më pas në orën 15:00 live nga “Niko Dovana” do të ndiqni sfidën Erzeni-Kukësi. Erzeni vjen në këtë sfidë me dy ndeshje pa fitore, ndërsa nga ana tjetër Kukësi po kalon një moment të mirë krahasuar me startin e sezonit. Duket se Dobi i ka futur në shina verilindorët që kanë arritur 2 fitore në 2 duelet e fundit në kampionat.
Në orën 18:30 vëmendja shkon në Serie A ku do të zbresin në fushë Sampdoria dhe Roma. Mourinho do të vendoset përballë ish-lojtarit të tij tek Interi i tripletës, Dejan Stankovic si një duel nxënës-mësues. Sampdoria nuk ka fituar ende asnjë ndeshje në këtë kampionat dhe një e tillë përballë Romës do të ngrinte shumë moralin për ekipin. Nga ana tjetër objektivi i Romës është i qartë, kryeqytetasit kërkojnë vetëm fioren.
Në mbrëmje, në orën 20:45 do të keni mundësi të ndiqni në Oversport dhe Tibo një tjetër ndeshje të Serie A. Këtë herë do të luhet Lecce-Fiorentina me këta të fundit që janë duke zhgënjyer në këtë start sezoni. Megjithatë, të besuarit e Italianos mund të kenë pikën e kthesës pikërisht ndaj Lecces. Nga ana tjetër edhe vendasit dëshirojnë të surprizojnë dhe të përfitojnë nga momenti jo i mirë i Fiorentinës. /oversport.tv
