Fuqia e presidentit serb Aleksandar Vuçiç, i cili ka kontroll mbi pothuajse të gjitha aspektet e jetës publike, përdoret për të përhapur frikën ndaj një bande kriminale që ai e ka lejuar të bëhet një krah virtual i shtetit, shkruan gazeta amerikane New York Times.
Në një tekst të gjatë e të ashpër “Presidenti, huliganët e futbollit dhe ‘Shtëpia e tmerreve’ të nëntokës”, për lidhjet e klanit kriminal të Veljko Belivuk me udhëheqjen shtetërore të Serbisë, gazeta amerikane thekson se në Serbi ka një “zonë gri mes shtetit dhe mafies”, raporton Beta.
“Kam biseduar me një duzinë qytetarësh të Serbisë, djemtë apo bashkëshortët apo fëmijët e të cilëve janë vrarë në rrethana të paqarta. Shumica prej tyre nuk e kishin idenë se cilët ishin vrasësit, por kishin histori të hollësishme për zyrtarë të korruptuar, bos droge, pazare armësh dhe fotografi inkriminuese. Të gjithë dukeshin të bindur se e vërteta po ua fshihej qëllimisht”, shprehet autori i shkrimit.
Ai shton se Vuçiç “nuk është përgjegjës për masën e frikës dhe krimit endemik që janë, si të thuash, pjesë e peizazhit në Ballkan”, por se ai “ka një dhunti demagogjike për t’u dhënë frymë të re stereotipeve poshtëruese”.
“Vuçiç e shfrytëzoi shkëlqyeshëm problemin e mafies serbe, duke krijuar një mjedis në të cilin linja e paqartë mes krimit të organizuar dhe shtetit funksionon në favor të tij”, shkruan New York Times.
“Gangsterizmi” qw lulëzoi nën Vuçiçin
Rëndësia e çështjes Belivuk, siç thuhet, “qëndron në faktin se ai e detyroi të gjithë Serbinë të përballet me bollëkun e provave rrethanore se Vuçiç lejoi që gangsterët të bëheshin krahu virtual i shtetit”.
“Rasti Belivuk hapi një dritare në një të ardhme të mundshme të zymtë, në të cilën Vuçiç po minon projektin evropian nga brenda, duke ndërtuar një shtet ku demokracia është një fasadë dhe ku bandat kriminale përdoren për të përhapur frikën”, thuhet në tekst.
Gazeta thekson se “gangsterizmi që lulëzoi nën Vuçiçin, së bashku me kërcënimet periodike të Serbisë për të ‘mbrojtur’ serbët etnikë në pjesë të tjera të rajonit”, mund të minojnë paqen që u vendos në Ballkan në vitin 1995.
Evropianët e dinë mirë këtë, si dhe presidenti rus Vladimir Putin “i cili ka arsye të reja për t’i ndarë ato”, thotë gazeta, duke shtuar se Kremlini “ka një histori të gjatë të mbështetjes ndaj nacionalistëve serbë si sllavë të rrethuar dhe më shumë motive sesa ndonjëherë, falë luftës në Ukrainë, të shkaktojë telashe në Ballkan”.
“Por rreziqet për Evropën janë më të thella se kaq. Marka e shovinizmit dhe demagogjisë etnike e Vuçiçit pasqyron atë të aleatit të tij Putin, dhe përhapja e demokracisë joliberale, e cila po forcohet në pjesë të kontinentit, përfaqëson një kërcënim të barabartë, ndoshta më të keq”, thuhet në tekst.
Vuçiç në pozitë të pushtetit ekstrem
Autori thekson se mbështetja që Belivuk dhe miqtë e tij kanë marrë nga policia dhe Ministria e Brendshme gjatë dekadës së fundit është dokumentuar mjaft në dëshmitë e gjykatës, bisedat telefonike të përgjuara dhe fotografitë.
“Qëndrimi se e gjithë kjo mund të kishte ndodhur pa dijeninë e Vuçiçit shkakton të qeshura në Beograd. Para se Vuçiç të ishte president, ai ishte kryeministër, dhe dhjetë vjet më parë ai riorganizoi shërbimet e sigurisë së Serbisë. Ai tani ka pothuajse kontroll të plotë mbi pothuajse të gjitha aspektet e jetës publike. Nga parlamenti, gjykatat, policia dhe biznesi, Vuçiç trajtohet me respekt lajkatar”, shkruan gazeta e New York-ut.
Gjatë nëntë viteve të pushtetit të Vuçiçit, huliganët serbë të futbollit dhe grupet kriminale që mbivendosen me ta, u përfshinë në politika të paqëndrueshme etnike në rajon, tha ai, duke shtuar se disa prej tyre ishin besnikë ndaj Rusisë.
“Disa serbë i janë bashkuar grupit paraushtarak Wagner, i cili ka një histori të angazhimit të kriminelëve dhe postimit të videove të rekrutimit në gjuhën serbe për luftën në Ukrainë. Edhe pse Vuçiç e kritikoi atë grup, Serbia mbetet një lloj linje mes Rusisë dhe Perëndimit. E gjithë kjo e vendos Vuçiçin në një pozitë të pushtetit ekstrem. Në një krizë, ai mund të vendosë nëse rajoni i Ballkanit do të shkojë drejt paqes apo nëse ditët e dhunës do të kthehen”, sipas New York Times. /tesheshi.com/
