09:27 – Nis takimi i Escobarit dhe Lajçakut me përfaqësuesit e serbëve të Kosovës
Emisari amerikan për Ballkanin Perëndimor dhe ai i BE-së për dialogun, Gabriel Escobar dhe Miroslav Lajçak, kanë nisur takimin me përfaqësuesit politikë të serbëve të Kosovës.
Në këtë takim po merr pjesë kryetari i Listës Serbe Goran Rakiq dhe kryetarët e komunave veriore, njofton Klankosova.tv.
Bashkë me Escobar dhe Lajçak në Mitrovicë është edhe ambasadori amerikan në Kosovë, Jeffrey Hovenier, i cili i ka shoqëruar pothuajse në secilin takim që dyshja amerikano-evropiane e ka pasë në Kosovë.
09:20 – Escobar dhe Lajçak arrijnë në Mitrovicë
I dërguari i Bashkimit Evropian për dialogun, Miroslav Lajçak, dhe ai i ShBA-së për Ballkanin Perëndimor, Gabriel Escobar, kanë arritur në Mitrovicë ku pritet të takohen me përfaqësuesit politikë të serbëve të Kosovës.
09:16 – Escobar dhe Lajçak shkojnë në Mitrovicë në fund të vizitës në Kosovë
I dërguari i posaçëm i Bashkimit Evropian për dialogun Kosovë-Serbi, Miroslav Lajçak, dhe i dërguari i ShBA-së për Ballkanin Perëndimor Gabriel Escobar do të shkojnë në Mitrovicë në fund të vizitës në Kosovë.
Ata pritet të takohen me përfaqësuesit politikë të serbëve të Kosovës, njofton Klan Kosova.
Escobar dhe Lajçak gjatë ditës së djeshme janë takuar me presidenten Vjosa Osmani dhe kryeministrin Albin Kurti.
Emisari evropian pasditen e djeshme ka takuar bashkërisht edhe liderët e partive opozitare në vend, derisa një gjë të tillë e kishte bërë një ditë më herët edhe i dërguari amerikan për Ballkanin Perëndimor.
Ndërmjetësuesi i dialogut nga Bashkimi Europian, Miroslav Lajçak, ka treguar detaje nga këto takime në Kosovë përmes cicërimave në Twitter.
Ai tha se me Escobar dhe Osmanin kanë diskutuar për rëndësinë e shmangies së tensioneve të mundshme në veri të Mitrovicës, derisa me shefin e qeverisë kosovare, përpos kësaj teme, kanë folur për takimin e javës së kaluar në Bruksel.
Lajçak dha pak detaje edhe nga takimi me opozitarët kosovarë dukë thënë se “mirëpret mirëkuptimin dhe mbështetjen e tyre për dialogun për normalizimin e marrëdhënieve i cili është interes kombëtar për Kosovën”.
Nuk dihet nëse sot, në fund të vizitës në vendin tonë, Gabriel Escobar dhe Miroslav Lajçak do t’i adresohen mediave kosovare.
