Fillimisht ishte kompania e auditimit “Deloitte”, ndërsa dje ka qenë UEFA që ka konfirmuar fuqinë ekonomike të Realit të Madridit. Raporti i Pasqyrës së Financave dhe Investimeve të Klubeve Europiane, i publikuar të enjten nga UEFA, e vendos klubin e kryesuar nga Florentino Perez si klubin me më shumë të ardhura në futbollin europian në sezonin 2022-2023.
UEFA i vlerëson të ardhurat që Madridi mori sezonin e kaluar në 841 milionë euro (shifra e treguar nga kontabiliteti zyrtar i klubit e rriti paksa, deri në 843 milionë euro). Në këtë mënyrë “los blancos” kanë lënë pas të gjithë, gjigantët e Premier Ligës në radhë të parë mes të cilëve dhe kampionët e Europës në fuqi, Mançester Sitin që ka arritur në 836 milionë euro të ardhura në sezonin e kaluar.
Vetëm dy skuadra të tjera i kalojnë 800 milionë të ardhurat: ato janë Barça (815 milionë euro) dhe Paris SG-ja (807 milionë euro). Gjithsej kanë qenë 132 klube europiane të marra në shqyrtim nga UEFA dhe që kanë shënuar një rritje të të ardhurave me 13%.
Sigurisht që Premier Liga paraqitet me numrin më të lartë të klubeve në këtë renditje të veçantë, ku veç Siti janë dhe Junajtid, Totenhemi, Liverpuli, Çelsi, Arsenali, Njukasëlli, Uest Hami e Brajtoni.
PANORAMASPORT.AL
