Pas ndalesës në kryeqytet në ndeshjen kundër Laçit, Tirana do të kërkojë rikthimin tek fitorja në “Adush Muça” të Ballshit. Sfida kundër Bylisit është shumë e rëndësishme për të mos humbur terren me rivalët direkt për titullin kampion. Por historia tregon se kjo ndeshje nuk është aq e lehtë dhe bardheblutë duhet të bëjnë kujdes nga kjo transfertë. Në 5 ndeshjet e fundit, ku përfshihet edhe Kupa e Shqipërisë, Tirana ka arritur të fitojë vetëm 1 ndeshje, ndërsa Bylis ka fituar 2 dhe 2 kanë përfunduar në barazim.
Tirana i gëzohet formës së mirë të Redon Xhixhës dhe lajmi i mirë është rikthimi i Lulajt pas pezullimit prej kartonit të kuq në derbi. Në këtë mënyrë, Shehi mund të mbështetet tek mbrojtësi për të spostuar Aleksin përpara në mesfushë. Në kampin e Tiranës janë të vetëdijshëm që kjo është një ndeshje që kërkon seriozitet dhe përqendrim maksimal.
Bylisi është një ekip që i ka befasuar të gjithë në këtë sezon të Superiores. Pavarësisht humbjes me Kukësin, mallakastriotët e Bellajt kanë besim që në fushën e tyre mund të mbështeten tek tifozët për të rigjetur sërish fitoren. Diferenca mes dy skuadrave është vetëm 1 pikë në klasifikim dhe kjo është shenjë e qartë e punës së mirë që ka bërë stafi. / Oversport.tv