MOSKË, 14 mars /ATSH-DPA/ – Mijëra qytetarë dolën për të protestuar kundër luftës së Rusisë në Ukrainë, në pjesë të vendit të pushtuara nga forcat e Moskës si dhe në të gjithë Rusinë dhe Gjermaninë.
”Në qytetin ukrainas të Khersonit, mijëra njerëz u drejtuan drejt qendrës së qytetit në një shfaqje zemërimi ndaj pushtimit rus”, sipas mediave lokale.
Turmat mund të shiheshin duke valëvitur flamujt ukrainas në fotot dhe videot e publikuara nga gazeta ”Ukrayinska Pravda”.
Ata kërkuan tërheqjen e trupave ruse, duke brohoritur “Shtëpi!” dhe “Khersoni është ukrainas”.
Më herët, presidenti ukrainas Volodymyr Zelensky paralajmëroi se Rusia po përgatit një pseudoreferendum për të krijuar një Republikë Popullore pro Moskës.
Forcat ruse tani kanë ndaluar demonstratat në qytetin ukrainas të Melitopolit pas protestave të përsëritura nga vendasit dhe është vendosur një shtetrrethimi.
Në Rusi, ku mbulimi i luftës është shumë i kufizuar, 800 persona u arrestuan për demonstrim kundër konfliktit, sipas aktivistëve të të drejtave civile.
”Në total, demonstruesit dolën në rrugë në më shumë se 35 qytete të dielën”, njoftoi në mbrëmje organizata OVD-Info.
Ministria e Brendshme ruse kishte konfirmuar rreth 300 arrestime në një protestë të paautorizuar në kryeqytetin Moskë, ku demonstratat mbeten të ndaluara nën kufizimet pandemike.
OVD-Info thotë se të paktën 14 000 persona janë arrestuar, pas vendimit të Rusisë për të pushtuar Ukrainën më 24 shkurt.
Fotot dhe videot në mediat sociale treguan njerëz që po tërhiqeshin zvarrë nga oficerët e policisë.
Protestat u mbajtën në 21 qytete, nga Vladivostok në lindje deri në Irkutsk në liqenin Bajkal dhe qytetin siberian të Tomsk.
”Në kryeqytetin Moskë, një shesh turistik popullor pranë Kremlinit u rrethua gjerësisht me rrjeta metalike”, raportoi një korrespondent i DPA.
Qindra zyra të njësisë speciale të policisë OMON ishin në gatishmëri, disa të veshur me jelek antiplumb dhe helmeta.
Protestat u mbajtën edhe përtej Rusisë dhe Ukrainës. Në Berlin, 60 000 persona u mblodhën në sheshin qendror të qytetit, ”Alexanderplatz” në mesditë dhe më pas ecën drejt Portës së Brandenburgut.
Të pranishmit varionin nga të rinjtë tek të moshuarit dhe përfshinin familje me fëmijë të vegjël.
Disa mbanin tullumbace blu dhe të verdha, ndërsa të tjerët mbanin pankarta që shkruanin “Stop Luftës”, “Paqe” dhe “Ku është vaksina kundër luftës?”.
65 000 të tjerë marshuan në qytete të tjera gjermane si Shtutgart, Hamburg, Frankfurt dhe Leipzig./ a.jor.
