Paolo Tramexani është përsëri në kërkim të një skuadre tjetër. Aventura e fundit me Sionin në Zvicër nuk shkoi ashtu siç mendonte ish-ndihmësi i Xhani De Biazit te Shqipëria dhe ai tashmë po pret një tjetër ofertë të duhur, për të vijuar karrierën në pankinë, siç ka treguar në një intervistë për ”L’Interista”.
“Po. Kam dëshirë të kthehem. Ndjek ndeshjet dhe për momentin po qëndroj me familjen time. Përditësohem me të rejat, shoh Serinë A, kështu është mënyra se si kaloj kohën në pritje të mundësisë së duhur”, tha Tramexani për portalin italian.
Dhe duke parë Serinë A, ai duket i bindur se lufta për titull do të jetë mes dy skuadrave, Interit dhe Juventusit. “Për atë që ka treguar kampionati, duket si një luftë dyshe dhe mund të vazhdoje kështu. Pastaj është e qartë që Interi duket sikur ka atë forcën, atë mentalitetin dhe skuadrën për t’u shkëputur, jam i bindur. E shoh Interin shumë të përqendruar te kampionati, që në fillim të vitit më duket sikur i është mbushur mendja se do yllin e dytë”, shpjegoi Tramexani i cili në karrierën e tij si futbollist ka qenë edhe pjesë e Interit.
PANORAMASPORT.AL
