Në vitin 2023 në Itali, pothuajse 430 mijë persona u gjendën në kushtet e varfërisë shëndetësore, njerëz këta, të cilëve siç shkruan shtypi vendas, u është dashur të kërkojnë ndihmë për të siguruar ilaçe dhe trajtime falas.
Shifra e përcjellë në raportin e “Varfëria shëndetësore dhe dhurimi i barnave”, është rritur me 10% krahasuar me vitin që shkoi kur në një situatë të tillë ndodheshin rreth 390 mijë vetë. Hartuesit e tij thonë se të gjitha familjet po detyrohen ta përballojnë këtë rritje nga xhepat e tyre.
Sergio Daniotti, president i Fondacionit Banco Farmaceutico u shpreh se shumë njerëz në kushte varfërie nuk janë më në gjendje të marrin trajtim jo vetëm sepse nuk kanë burime ekonomike, por edhe sepse shpeshherë ata nuk kanë qasje as tek mjeku i përgjithshëm, nuk njohin të drejtat e tyre në çështjet e shëndetit, apo nuk kanë një rrjet marrëdhëniesh dhe miqësish, të cilat t`i orientojnë drejt ofertave të shërbimeve shëndetësore”.
Refuzimi për të kryer vizita tek mjeku specialist është sot tek familja e varfra pesë herë më i lartë se ai i pjesës tjetër të popullsisë, dhe kjo, thekson Daniotti, kontribuon në cenimin në përgjithësi të gjendjes shëndetësore të familjeve në vështirësi ekonomike. Konfirmohet kështu më në fund, sipas shtypit vendas, rrethi vicioz mes të ardhurave të ulëta dhe varfërisë shëndetësore, përqindja e personave në kushte të këqija ose edhe shumë të këqija shëndetësore, rezulton më e lartë tek ata që kanë kushte të pasigurta ekonomike, krahasuar me pjesën tjetër të popullsisë.
Përpos kësaj, cilësia e jetës e lidhur me problemet e rënda shëndetësore është më e keqe tek individët që kanë burime më të pakta financiare sesa ata me të ardhura mesatare apo të larta.
Top Channel
