Sezoni i jashtëzakonshëm që po bën me Interin dhe menaxhimi spektakolar dhe perfekt i grupit të futbollistëve. Për këto motive, por jo vetëm, Simone Inzagi është shpallur fitues i trofeut “Enzo Bearzot” që akordohet nga Federata Italiane e Futbollit në bashkëpunim me një shoqatë sportive.
“Inzagi të kujton Bearzotin në menaxhimin e skuadrës dhe është lider i një grupi”, shkruhet në njoftim. Në sezonin e kaluar, këtë çmim personal për trajnerët e fitoi Luçiano Spaleti. Fjalët e Inzagit- Trajneri zikaltër ka kërkuar ta ndajë këtë trofe individual me të gjithë ata që punojnë me të, pasi mendon se nuk do të ishte bërë e mundur.
“Jam thellësisht mirënjohës për këtë çmim shumë prestigjioz që mban emrin e një trajneri të madh dhe një njeriu të futbollit. Ky çmim nuk do të ishte bërë i mundur pa mbështetjen e jashtëzakonshme e të gjithëve që më kanë mbështetur gjatë kësaj kohe dhe kanë bashkëpunuar me mua. Ky çmim shkon për ta dhe për familjen time”, ka thënë përmes një mesazhi trajneri i Interit. Ai në fakt nuk ka dashur që të mbajë një konferencë për shtyp për mediat në prag të kësaj sfide duke qenë i përqendruar maksimalisht te ndeshja kundër Bolonjës.
GRAVINA- Presidenti i federatës italiane ka thënë se vendimi për Inzagin ishte unanim dhe ajo që po bën trajneri i Interit është diçka e jashtëzakonshme. “Vendimi për t’ia dorëzuar këtë çmim Simone Inzagit ka qenë unanim sepse ashtu siç është cituar në motivin e fitores ai është rritur shumë në të gjitha aspektet si brenda dhe jashtë fushës së lojës. Është një përfaqësues i madh i evolucionit, në aspektin spektakolar të shkollës së futbollit italian. Një tjetër aspekt që më pëlqen të theksoj është përfshirja e tij me skuadrën që stërvit, raporti që ka me stafin, lojtarët dhe tifozët”, ka thënë Gravina.
PANORAMASPORT.AL
