FRANKFURT, 3 shkurt /ATSH-DPA/ – Ministrja e Jashtme e Gjermanisë, Annalena Baerbock ka paralajmëruar Izraelin për rrezikun e ofensivës së tij ushtarake në pjesën më jugore të Rripit të Gazës.
“Marrja e veprimeve tani në Rafah, vendi i fundit dhe më i mbipopulluar, siç njoftoi ministri izraelit i Mbrojtjes, thjesht nuk do të ishte i justifikueshëm”, tha Baerbock për Redaktionsnetzwerk Deutschland (RND).
Sipas gazetës “Times of Israel”, ushtria izraelite synon të zgjerojë luftimet e saj kundër Hamasit në zonën e Rafahut.
“Së bashku me partnerët tanë amerikanë, unë ia kam bërë të qartë qeverisë izraelite prej disa kohësh se banorët në Gaza nuk mund të zhduken në ajër”, tha ministrja gjermane.
Mbi 1,3 milionë njerëz jetojnë në Rafah dhe zonën përreth, më shumë se gjysma e popullsisë së Rripit të Gazës prej rreth 2,2 milionë banorësh. Rreth një milion njerëz po kërkojnë strehim nga luftimet atje. Para luftës, Rafah ishte shtëpia e rreth 250 000 njerëzve.
Pothuajse, katër muaj pas sulmeve të koordinuara të Hamasit në jug të Izraelit më 7 tetor, në të cilat u vranë rreth 1200 njerëz, trupat tokësore izraelite kanë lëvizur thellë në Rripin e Gazës në përpjekje për të shkatërruar Hamasin.
Megjithatë, skaji jugor i zonës së mbyllur bregdetare, e cila kufizohet me Egjiptin me qytetin e ndarë të Rafahut dhe pikën kufitare me të njëjtin emër, deri më tani ka qenë jashtë mundësive të trupave tokësore.//a.i/
