TEL AVIV, 25 nëntor /ATSH-DPA/ – Izraeli thuhet se ka marrë një listë me emrat e pengjeve të mbajtura nga Hamasi në Gaza, të cilët do të lirohen sot si pjesë e një marrëveshjeje midis dy palëve ndërluftuese.
Familjet e 13 pengjeve janë informuar, raportoi portali izraelit i lajmeve ynet dhe media të tjera të premten në mbrëmje, duke cituar zyrën e kryeministrit Benjamin Netanyahu.
Zyrtarët izraelitë konfirmuan se tetë nga 13 pengjet izraelitë që do të lirohen sot janë fëmijë.
Pas fillimit të armëpushimit në Gaza, një grup i parë prej 24 pengjesh – 13 izraelitë dhe 11 të huaj – të cilët u rrëmbyen në Rripin e Gazës shtatë javë më parë u liruan të premten. Në mesin e grupit izraelit ishin katër shtetas të dyfishtë, të cilët gjithashtu kanë nënshtetësi gjermane.
Në këmbim, Izraeli liroi një grup më të madh të të burgosurve palestinezë nga burgjet e tij.
Pengjet izraelite që u kthyen në Izrael të premten janë dërguar në spitalet pranë Tel Avivit dhe janë ribashkuar me familjet e tyre.
”Katër fëmijë, tre nëna dhe një gjyshe, mbërritën në Qendrën Mjekësore të Fëmijëve ‘Schneider”, citoi gazeta izraelite ”Haaretz” drejtorin e institucionit, Efrat Baron Har Lev.
”Gjendja e tyre fizike është e mirë”, ka shtuar drejtori.
Pesë pengje thuhet se u dërguan në Qendrën Mjekësore ”Wolfson” dje në mbrëmje./ a.jor.