PARIS, 4 mars /ATSH-DPA/- Parlamenti francez votoi sot për të përfshirë të drejtën e abortit në kushtetutë.
Shumica e tre të pestave të kërkuara për këtë u arrit gjatë një takimi sot të të dy dhomave të parlamentit në Versajë. Vetëm 72 deputetë votuan kundër dhe 780 votuan pro.
“Ne jemi të përhumbur nga vuajtja dhe kujtimi i kaq shumë grave që kanë vuajtur për dekada nga mungesa e mundësisë për të qenë të lira”, tha kryeministri Gabriel Attal.
Gjatë votimit, disa qindra aktivistë kundër abortit u mblodhën pranë Kongresit në Versajë për të protestuar kundër ndryshimit kushtetues.
Kisha Katolike gjithashtu e bëri të qartë se vazhdon të refuzojë abortet.
Abortet deri në javën e 10-të të shtatzënisë janë lejuar në Francë që nga viti 1975.
Që atëherë, ligji ka ndryshuar për të lejuar gratë të kryejnë abort deri në javën e 14-të të shtatzënisë dhe shpenzimet e procedurës mbulohen nga sigurimet shëndetësore.//a.i/
