Sezoni i ri i Formulës 1 ka ngritur siparin ashtu siç u mbyll i vjetri, nën dominimin e Red Bull dhe Max Verstappen, që pasi siguroi “pole position”-in një ditë më parë, ia doli të triumfojë bindshëm në Çmimin e Madh të Bahreinit.
Kampioni në fuqi i botës dominoi gjatë gjithë garës dhe mori një fitore të qetë, teksa fill pas tij, mbylli garën shoku i skuadrës te Red Bull, Sergio Perez, i cili e mori shumë shpejt vendin e dytë, për të mos e lëshuar më.
U ngjit në podium edhe Ferrari me pilotin Carlos Sainz, i cili ia doli të lërë pas shokun e skuadrës, Charles Leclerc, me këtë të fundit që akuzoi edhe një problem me sistemin e frenimit.
Probleme me paketën e shpejtësisë për Mercedesin, që gjithsesi mori vendin e pestë me Russel dhe vendin e 7 me britanikun tjetër, Lewis Hamilton.
Top Channel
