TIRANË, 11 mars /ATSH/- Rusia duket në rrugën e duhur për të prodhuar gati tre herë më shumë municione artilerie sesa SHBA-ja dhe Evropa, një avantazh kyç përpara asaj që pritet të jetë një tjetër ofensivë ruse në Ukrainë këtë vit, sipas CNN.
“Rusia po prodhon rreth 250 000 municione artilerie në muaj, ose rreth 3 milionë në vit”, sipas vlerësimeve të shërbimeve sekrete të NATO-s.
“Së bashku, SHBA-ja dhe Evropa kanë kapacitetin për të gjeneruar vetëm rreth 1,2 milionë municione në vit për t’i dërguar në Kiev”, tha një zyrtar i lartë i shërbimeve sekrete evropiane.
Ushtria amerikane vendosi një synim për të prodhuar 100 000 fishekë artilerie në muaj deri në fund të 2025, më pak se gjysma e prodhimit mujor rus, dhe madje ky numër tani është i paarritshëm me 60 miliardë dollarë fonde për Ukrainën të bllokuara nga Kongresi.
“Ajo në të cilën jemi tani është një luftë prodhimi”, tha një zyrtar i lartë i NATO-s.
“Rezultati në Ukrainë varet nga mënyra se si secila palë është e pajisur për të zhvilluar këtë luftë”, tha ai.
Zyrtarët thanë se Rusia aktualisht po gjuan rreth 10 000 predha në ditë, krahasuar me 2 000 në ditë nga pala ukrainase.
Mungesa e municioneve vjen ndoshta në momentin më të rrezikshëm për përpjekjet luftarake të Ukrainës që kur Rusia marshoi për herë të parë drejt Kievit në shkurt të vitit 2022.
Fondet e SHBA-së për armatosjen e Ukrainës kanë mbaruar dhe opozita republikane në Kongres ka bllokuar ndihmën e planifikuar.
Ndërkohë, Rusia së fundmi mori kontrollin e qytetit ukrainas Avdiivka. Ukraina po lufton jo vetëm me një mungesë municionesh, por edhe me një mungesë në rritje të fuqisë punëtore në vijat e para te frontit. //a.i/
