SEUL, 15 janar /ATSH-DPA/- Fuqia e vetëshpallur bërthamore, Koreja e Veriut ka raportuar se ka bërë progres të mëtejshëm në zhvillimin e raketave me rreze të gjatë veprimi me koka hipersonike.
“Autoriteti përgjegjës për raketat testoi dje me sukses një raketë me rreze të mesme veprimi”, njoftoi media shtetërore.
Raketa ishte e ngarkuar me një kokë lufte hipersonike të manovrueshme. Nuk u dhanë detaje të distancës së fluturimit.
Të dy vendet, Koreja e Jugut dhe Japonia e regjistruan testin. Ushtria e Koresë së Jugut informoi për një raketë të dyshuar me rreze të mesme veprimi.
Ajo kishte fluturuar rreth 1 000 kilometra përpara se të binte në Detin e Japonisë, të cilin Koreja e quan Deti Lindor.
Koreja e Jugut e dënoi testin si një shkelje të qartë të rezolutave të OKB-së që e ndalojnë Korenë e Veriut të testojë raketa balistike të çdo rrezeje.
Raketa të tilla mund të pajisen me një kokë bërthamore.
Sipas raporteve të Koresë së Veriut, testi kishte për qëllim të demonstronte rrëshqitjen dhe manovrimin e një koke hipersonike dhe besueshmërinë e motorëve të raketave me karburant të ngurtë të zhvilluar rishtazi.
Testi ishte pjesë e aktiviteteve të rregullta për zhvillimin e sistemeve të armëve me performancë të lartë.
Raketat me karburant të ngurtë japin kohë më të shkurtër paralajmërimi.
Udhëheqja komuniste në Phenian ka vite që po ecën përpara me zhvillimin e raketave me aftësi bërthamore. Sipas Phenianit, ajo ka testuar gjithashtu raketa hipersonike në disa raste.
Armët e tilla janë veçanërisht të vështira për t’u kapur pasi ato arrijnë më shumë se pesë herë shpejtësinë e zërit dhe janë të manovrueshme.
Testi i parë raketor i Koresë së Veriut për vitin e ri u bë mes tensioneve në rritje në gadishullin Korean.
Koreja e Veriut ka rritur ndjeshëm shkallën e testeve të saj raketore gjatë dy viteve të fundit dhe retorikën e saj kundër SHBA-së dhe Koresë së Jugut.
Të dy vendet kanë zgjeruar bashkëpunimin e tyre ushtarak në përgjigje të retorikës së Phenianit.//a.i/
