BERLIN/JERUSALEM, 8 janar /ATSH-DPA/ – Ministrja e Jashtme gjermane Annalena Baerbock takoi dje homologun e saj të ri izraelit, Israel Katz në Jerusalem.
”Katz e falënderoi atë për mbështetjen e Gjermanisë për Izraelin dhe angazhimin për lirimin e pengjeve në Rripin e Gazës”, tha zyra e tij e shtypit.
”Kjo vlen edhe për përpjekjet rajonale për të hequr milicinë shiite libaneze Hezbollah nga kufiri me Izraelin”, thuhet në deklaratë.
Ky është udhëtimi i katërt i Baerbock në Izrael dhe rajon që nga sulmet e Hamasit ndaj komuniteteve izraelite në tetor.
Në takimin e saj me ministrin e Jashtëm izraelit morën pjesë edhe të afërmit e pengjeve të mbajtura ende në Rripin e Gazës.
Katz tha se ai gjithashtu i kërkoi Baerbock mbështetje në lidhje me atë që ajo e quajti padinë “absurde” të Afrikës së Jugut kundër Izraelit përpara Gjykatës Ndërkombëtare të Drejtësisë në Hagë.
Para se të largohej, Baerbock të dielën bëri thirrje për t’i dhënë fund ciklit të dhunës në Lindjen e Mesme.
“Terrorizmi duhet të marrë fund, nevoja humanitare e njerëzve duhet të marrë fund, rajoni duhet të dalë nga cikli i përjetshëm i dhunës”, tha ajo.
”Gaza nuk duhet të lejohet të përbëjë një kërcënim për Izraelin në të ardhmen, Hamasi duhet të heqë armët dhe milicia e Hezbollahut në Liban e mbështetur nga Irani dhe Houthis në Jemen duhet t’i japin fund aktiviteteve të tyre të rrezikshme”, tha ajo.
Baerbock gjithashtu vuri në dukje se “skenari i terrorit nuk duhet të vazhdojë”.
Baerbock do të vizitojë sot një fshat palestinez në Bregun Perëndimor dhe do të takohet me ministrin e Jashtëm palestinez Riyad al-Maliki në Ramallah.
Më pas është planifikuar udhëtimi i mëtejshëm për në Egjipt, i ndjekur nga një vizitë në Liban të mërkurën.
Pas vizitës së saj, zyrtarja gjermane do të fluturojë për në Filipine, Malajzi dhe Singapor./ a.jor.
